ඉන්දීයානු අග්‍රාමාත්‍ය නරේන්ද්‍ර මෝදි මහතා රාජ්‍ය සංචාරයක් සඳහා අද (05) දිවයිනට පැමිණියා.
ග්‍රාමාත්‍ය නරේන්ද්‍ර මෝදි මහතා මෙවර සංචාරයේ නිරත වන්නේ ශ්‍රී ලංකාව සහ ඉන්දියාව අතර “සියවස් මිතුදමක සෞභාග්‍යවත් අනාගතයකට බැඳීමක්”(Friendship Of Centuries Commitment to Prosperous Future) යන සංකල්පය තහවුරු කරමින්.
ඉන්දීය අග්‍රාමාත්‍යවරයා පොලිස් අශ්වාරෝහක බලකාය පෙර‍ටු කර ගනිමින් නිදහස් චතුරස්‍රය පරිශ්‍රය වෙත කැඳවා ගෙන ඒමෙන් අනතුරුව ජනාධිපති අනුර කුමාර දිසානායක මහතා විසින් හරසරින් පිළිගනු ලැබුවා.
අග්‍රාමාත්‍යවරයාගේ නිල පිළිගැනීමේ උත්සවය ආරම්භ වූයේ දෙරටේ ජාතික ගී වාදනයෙන් අනතුරුවයි. එහිදී පූර්ණ රාජ්‍ය ගෞරව සහිතව සම්මාන වෙඩිමුර පවත්වා අග්‍රාමාත්‍ය නරේන්ද්‍ර මෝදි මහතා පිළිගනු ලැබුණා. අනතුරුව ඉන්දියානු අග්‍රාමාත්‍යවරයා විසින් ශ්‍රී ලංකා හමුදා ආචාර පෙළපාලියේ හරසර පිළිගනු ලැබුවා.
ඉන්දියානු අග්‍රාමාත්‍ය නරේන්ද්‍ර මෝදි මහතා සහ ජනාධිපති අනුර කුමාර දිසානායක මහතා විසින් ප්‍රභූ සම්මාන පිළිගැනීමෙන් අනතුරුව ඉන්දු - ශ්‍රී ලංකා නියෝජිත පිරිස හඳුන්වා දීම සිදු වුණා.
පිළිගැනීමේ උත්සවයෙන් අනතුරුව අග්‍රාමාත්‍ය නරේන්ද්‍ර මෝදි පෙරවරුවේ දී ජනාධිපති කාර්යාලයට පැමිණියා.
ශ්‍රී ලංකාවේ රාජ්‍ය සංචාරයක නිරත ඉන්දියානු අග්‍රාමාත්‍ය නරේන්ද්‍ර මෝදි අනිද්දා (07) වැනිදා තෙක් මෙරටට රැඳී සිටිනවා.
