ලංකා විදුලිබල මණ්ඩල තාක්‍ෂණික ඉංජිනේරු හා අධිකාරී සංගමයේ උප සභාපති නන්දන උදයකුමාර මහතා ඊයේ (10) දිනයේ දී විශේෂ මාධ්‍ය හමුවකට සහභාගී වෙමින් ආන්දෝලනාත්මක ප්‍රකාශයක් සිදු කර තිබෙනවා.
ඔහු කියා සිටින්නේ ආණ්ඩු මාරුවක් සිදු වුව ද විදුලිබල මණ්ඩලය තුළ විදුලි මා‍ෆියාව ක්‍රියාත්මක වීම නතර වී නොමැති බවයි. ජල විදුලිබලාගාර ආශ්‍රීත ජලාශවල ජලය වාන්දමන සහ රට තුළ ඇති තරම් ගල් අඟුරු තිබෙන මෙවන් කාලයක තවමත් ලංකා විදුලිබල මණ්ඩලය විසින් පෞද්ගලික බලාගාරවලින් විදුලිය මිලදී ගන්නා බව ඒ මහතා පවසා සිටිනවා.
මෙලෙස පෞද්ගලික විදුලි බලාගාරවලින් විදුලිය මිලදී ගැනීම සඳහා උපක්‍රමයක් ලෙස නොරොච්චෝලේ තාප විදුලිබලාගාරයේ එක විදුලි ජනන යන්ත්‍රයක් උපරිම ධාරිතාවයෙන් ක්‍රියාත්මක කර නොමැති බවයි ඒ මහතා අනාවරණය කර සිටින්නේ.
විදුලි ගාස්තු ඉහළ යාමට ද මෙම මා‍ෆියාව ප්‍රධාන කරුණක් වී ඇති බව උප සභාපතිවරයා පෙන්වා දෙනවා. එසේම ජල විදුලියෙන් සහ ගල්අඟුරු භාවිතයෙන් විදුලිය ජනනය කිරීමේ හැකියාව තිබීයදී පෞද්ගලික අංශයෙන් විදුලිය මිලදී ගැනීම විශාල නාස්තියක් බව ඒ මහතා සඳහන් කර සිටිනවා.
දිගින් දිගටම මෙම තත්ත්වය පැවතුණහොත් ලබන වසරේ පෙබරවාරි, මාර්තු කාලවලදී ඇතිවන වියළි කාලගුණික තත්ත්වයන් හමුවේ විදුලිය මිලදී ගැනීමට විදුලිබල මණ්ඩලයට මුදල් නොමැති බවත් එසේ වුවහොත් නැවතත් පැය 4-5 ක කාලයක් විදුලි කප්පාදුවක් සිදු විය හැකි බවත් ඒ මහතා පෙන්වා දෙනවා.
විදුලිබල මණ්ඩලයේ උද්ගතවී ඇති අර්බුදකාරී තත්වය පිළිබඳව කරුණු දැක්වීම සඳහා ඊයේ (10) මෙම මාධ්‍ය හමුව පැවැත්වුණා.
