රෝගාතුරව ප්‍රතිකාර ලබමින් සිටි ප්‍රවීණ රංගන ශිල්පී බර්ටි ගුණතිලක මහතා අභාවප්‍රාප්ත වී තිබෙනවා. බර්ටි ගුණතිලක මහතා 1924 අගෝස්තු 2 වන දින මහනුවර අම්පිටියේදී උපත ලැබුවා. අම්පිටිය ප්‍රාථමික විද්‍යාලයෙන් මූලික අධ්‍යාපනය හැදෑරූ බර්ටි මහතා මහනුවර සංඝරාජ පිරිවෙනෙන් ද්විතීයික අධ්‍යාපනය ලබා ගත්තා. ඉන්පසු ඔහු ආයුර්වේද වෛද්‍ය විද්‍යාලයට බැඳුණු අතර පාසල් කාලයෙන් පසු ඔහු කුලියාපිටිය ගල්පොල විද්‍යාලයේ සහකාර ගුරුවරයෙකු ලෙස සේවයට එක්වුණා. ඔහු සිංහල බෞද්ධයා පුවත්පතේ සෝදුපත් කියවන්නෙක් ලෙස ද සේවය සිදුකලා.
1953 මහජන පුවත්පත ආරම්භ කරන විට බෙදාහැරීමේ අංශයේ සේවයේ නියුතු බර්ටි ගුණතිලක මහතා 1953 චන්ද්‍රරත්න මානවසිංහ සහ මීමන ප්‍රේමතිලක ගේ සහාය ඇතිව ලංකා සීමාසහිත එක්සත් ප්‍රවෘත්ති පත්‍ සමාගම හෙවත් ලේක්හවුස් ප්‍රකාශකයන් හා සම්බන්ධ වුණා. ඔහු එහි කනිෂ්ඨ සෝදුපත් කියවන්නෙක් ලෙස වසර දොළහක් සේවය කලා. එම කාල වකවානුවේ දී ලේක්හවුස් වෘත්තීය සමිතිය විසින් ගෙන ගිය අරගලවලට සම්බන්ධ වු නිසා ඔහුට රැකියාව අහිමි වුණා.
බර්ටි ගුණතිලක මහතා විවාහ දිවියට ඇතුළුවූයේ සෝමා ගුණතිලක නම් ගුරුවරියකස් සමඟයි.
බර්ටි ගුණතිලක මහතා 1947 දී "ළමා පිටිය" වැඩසටහනෙන් රේඩියෝ සිලෝන් වෙත සම්බන්ධ වුණා. ඉන්පසු ජෝසප් සෙනෙවිරත්න, වින්සන්ට් වීරසේකර, හැරියට් සුරවීර, පිටිපන සිල්වා, සිසිර කුමාර මානික්කආරච්චි සමඟින් 1948 “විනෝද සමය” ගුවන් විදුලි නාට්‍යයට සම්බන්ධ වීමට ඔහුට හැකියාව ලැබුණා. 1954 දී ගුණතිලක ඔහුගේ සමීප මිතුරන් වූ ඇනස්ලි ඩයස් සහ සැමුවෙල් රොද්‍රිගු සමඟ එක්ව රේඩියෝ සිලෝන් සඳහා "විහිළු තහළු" විකට වැඩසටහන ඉදිරිපත් කළේ එච්.ඩී. විජේදාසගේ ආරාධනාවකට අනුවයි. එය අතිශයින් ජනප්‍රිය වූ අතර "ඩයස්-සැමුවෙල්-බර්ටි" ජනතාව හඳුන්වනු ලැබුවේ ‘‘රාජ තුන් කට්ටුව’’ යනුවෙන්. පසු වසරවලදී, ගැමුණු විජේසූරිය, ජෝසප් සෙනෙවිරත්න, ඇල්ෆ්‍රඩ් පෙරේරා සහ මර්සි එදිරිසිංහ වැනි තවත් බොහෝ චරිත එම වැඩසටහනට එක් වුණා.
1983 දී ශ්‍රී ලංකාවේ රූපවාහිනී වැඩසටහන් ආරම්භ වීමත් සමඟම රූපවාහිනියේ ආරම්භක වැඩසටහන "නන්දන වින්දන" සඳහා බර්ටි, ඇනස්ලි සහ සැමුවෙල් යන තිදෙනා එක් කර ගනු ලැබුවා. 1960 සිට 1990 දක්වා ඔවුන් රූපවාහිනියේ සහ ගුවන් විදුලියේ සෑම විකට වැඩසටහනකම පාහේ පෙනී සිටියා. වරක් ගුණතිලක ජනප්‍රිය හාස්‍ය කතා නාට්‍යයක් වන ‘‘විනෝද සමය’’ හි කෙටි කලිසමක්, කටේ සූප්පුවක්, වතුර බෝතලයක්, පැන්සලක් සහ පොතක් පැළඳ පාසල් සිසුවකු ලෙස “ටූ ටෝන්” චරිතයක් මවා පෑවා. මෙම චරිතය අතිශයින්ම ජනප්‍රිය විය.
ඔහුගේ මංගල සිනමා දර්ශනය 1951 දී රාජා වහබ් කාශ්මීර් විසින් අධ්‍යක්ෂණය කරන ලද "බණ්ඩා නගරයට පැමිණීම" චිත්‍රපටය හරහා පැමිණියා. එය දේශීය චිත්‍රාගාරයක නිර්මාණය වූ පළමු චිත්‍රපටය ලෙසද ඉතිහාස ගතවනවා. ඉන්පසුව "පෙම් මල් මාලා", "පාලම යට", "දෙවියනි සත්‍ය සුරකින්න", "මන මෝහිනී" සහ "සෝමි බෝයිස්" වැනි ජනප්‍රිය වාණිජ චිත්‍රපටවල සහය ප්‍රහසන චරිත රැසක් ඔහු රඟපානු ලැබුවා.
2013 දී කිංස්ලි විජේසුන්දර විසින් රචිත ඔහුගේ චරිතාපදානය "සදාදරණීය බර්ටි" ගුණතිලක මහතාගේ 89 වැනි උපන්දින සාදයට සමගාමීව කොස්නාතොට ගොඩකවෙල පිහිටි ඔහුගේ නිවසේදී එළිදැක්වුණා. 2013 නොවැම්බර් මස 13 වන දින සංස්කෘතික කටයුතු අමාත්‍යාංශය විසින් ජාතික සාහිත්‍ය කලා උළෙලේ දී "දේශ නේත්‍රු" සම්මානය බර්ටි ගුණතිලකයන්ට පිරිනමනු ලැබුවා. 2014 ජනවාරි 12 වැනි දින රූපවාහිනී රාජ්‍ය සම්මාන උළෙලේදී රූපවාහිනී ක්ෂේත්‍රයට කළ සේවය වෙනුවෙන් ඔහුට ජීවිතයේ එක් වරක් පිදෙන් යාවජීව සම්මානයෙන් පිදුම් ලැබුවා. 2021 දී, සිංහල සිනමාවේ මුල් දශකවල සිංහල සිනමාවට අමිල මෙහෙවරක් කළ කලාකරුවන් 21 දෙනෙකු වෙනුවෙන් පවත්වන ලද උත්සවයේදී ඔහු සම්මානයෙන් පිදුම් ලැබුවා.
බර්ටි ගුණතිලක මහතා දිවියෙන් සමුගන්නාවිට 98වන වියේ පසු වූවා.
