මෙරට පාසල් දරුවන් සඳහා විදේශීය භාෂා ඉගැනුමට ප්‍රවේශය ලබා දීමේ මාර්ගගත වැඩසටහන් මාලාවක් ක්‍රියාත්මක කිරීමට සැලසුම් කර තිබෙනවා. පෙර පාසල් හා ප්‍රාථමික අධ්‍යාපන, පාසල් යටිතල පහසුකම් හා අධ්‍යාපන සේවා රාජ්‍ය අමාත්‍ය පියල් නිශාන්ත ද සිල්වාගේ සංකල්පයක් පරිදි එක්සත් රාජධානියේ London School of Executive Limited ආයතනය සමග එක්ව රාජ්‍ය අමාත්‍යංශ.යේ මෙහෙයවීම සහ අධීක්ෂණය යටතේ මෙම ව්‍යාපෘතිය ක්‍රියාත්මක කිරීමට නියමිතය. මෙම ව්‍යාපෘතිය හරහා පාසල් දරුවන්ට ගැළපෙන ලෙස ජාත්‍යන්තර ප්‍රමිතියට අනුගතව ඉංග්‍රීසි, ප්‍රංශ, ස්පාඤ්ඤ, ජර්මන්, ඉතාලි, හිංදි, චීන, ජපන්, රුසියානු හා අරාබි යන භාෂා හැදෑරීමේ හැකියාව ඇති බව පැවසෙනවා. ජාත්‍යන්තර කාන්තා දිනය නිමිති කොටගෙන පැවැත්වීමට නියමිත ප්‍රධාන උත්සවයට සමගාමීව මෙම වැඩසටහන ද ආරම්භ කිරීමට බලාපොරොත්තු වන බවයි තොරතුරු වාර්තා වන්නේ.
දිවයින පුරා පාසල් වල විදුහල්පතිවරුන් මෙම වැඩසටහන පිළිබඳව දැනුවත් කිරීමේ වැඩපිළිවෙළක් මේ වන විටත් ආරම්භ කර ඇති බව රාජ්‍ය අමාත්‍ය පියල් නිශාන්ත පවසනවා.
