විශ්ව ශක්තියෙන් රෝගීන් සුව කරන බව පවසන දීගොඩ කුමාර පිළියන්දල මධ්‍ය මහා විද්‍යාලයේ සංවිධානය කළ සුව කිරීමේ මෙහෙයකදී ශිෂ්‍යයෙකුට ලබා දුන් පාන් කැබැල්ලක් ආසාදනය වීමෙන් එම ශිෂ්‍යයාට දැඩි සත්කාර ඒකකයේ ද ප්‍රතිකාර ගැනීමට සිදු වුණා. පිළියන්දල පොලිසිය මෙම සිද්ධියට අදාළව දීගොඩ කුමාරට විරුද්ධව නඩු පවරා තිබු අතර පසුගිය 08 වැනිදා කැස්බෑව මහෙස්ත්‍රාත්වරයා දීගොඩ කුමාර වහා අත්අඩංගුවට ගන්නා ලෙස පොලිසියට නියෝග කළා.
නමුත් දීගොඩ කුමාර වෙනුවෙන් පෙනී සිටි නීතිඥවරුන් පිරිස දිගින් දිගටම අධිකරණයට කියා සිටියේ දීගොඩ කුමාරට විරුද්ධව ඇති මිනී මැරීමට තැත් කිරීමේ චෝදනාව වැරදි සහගත බවයි. එසේම දීගොඩ කුමාරට මීට පෙර අධිකරණයට පැමිණීමට නොහැකි වූයේ ඔහුගේ මව ජනවාරි 02 වැනි දින සිට 16 වැනිදා දක්වා කොළඹ පෞද්ගලික රෝහලක ප්‍රතිකාර ලබමින් සිටි නිසා බවත් ජනවාරි 18 වැනි දින විත්තිකරුගේ මව මිය ගිය බවත් අධිකරණයට කරුණු දක්වමින් ඔහුගේ නීතිඥයන් වැඩි දුරටත් කියා සිටියා.
කෙසේ වෙතත් දරුවාට පාන් ආහාරයට ගැනීමට පෙලඹවීමක් දීගොඩ කුමාර සිදු කර ඇති බැවින් ඉදිරියටත් මෙවන් සිදුවීම් වීමේ අවදානමක පවතින බව ප්‍රකාශ කළ මහේස්ත්‍රාත්වරයා දීගොඩ කුමාර මේ මස 31 වැනිදා දක්වා රක්ෂිත බන්ධනාගාරගත කරන ලෙස නියෝග කළා.
මෙම තීන්දුව ප්‍රකාශයට පත් කිරීමත් සමඟම දීගොඩ කුමාර සිහිසුන්ව බිම ඇද වැටුණු අතර එම අවස්ථාවේ ඔහු පෞද්ගලික රෝහලකට රැගෙන යාමට ඔහුගේ නීතිඥයන් කළ ඉල්ලීම මහෙස්ත්‍රාත්වරයා ප්‍රතික්ෂේප කළා.
